Haïti

Pòdepè : lòt sèn piyaj fèt jodi lendi a ankò nan kad mouvan revandikasyon popilè yo

Publié le : mardi 20 septembre 2022 à 07:08

Plizyè manm nan popilasyon an ki reprann flanbo mobilizasyon an maten lendi 19 septanm nan piye lokal CARITAS ki sou zòn Lavo sou wout Senlwidinò a nan Pòdepè. Moun yo bwote estòk manje ki te nan lokal la. Lokal Sant Operasyon Ijans Depatmantal la konnen menm sò sa a.

Mouvman popilè yo ki te kalme wikenn pase a reprann lendi maten 19 septanm nan nan Pòtoprens ak nan plizyè vil pwovens. Pwotestatè yo ki enève ak dènye adrès pou nasyon an Premye minis Ariel Henry te bay nan dimanch aprèmidi 18 septanm lan rebloke lari yo, kontinye ap manifest epi an menm tan kenbe pratik piye enstitisyon piblik kou prive.

Aprè Gonayiv, se nan Pòdepè lokal òganizasyon imanitè katolik la CARITAS sibi atak manifestan ki piye lokal yo. Plizyè dizèn sitwayen ki te bare vizaj yo bwote estòk manje ki te nan espas la ki ta disponib la pou akonpanye moun ki ta nan nesesesite pou sezon siklonik la, daprè sa sèten jounalis ki te sou plas fè konnen.

An menm tan lokal Sant Operasyon Ijans Depatmantal la (COUD, nan sig fransè) nan vil Pòdepè a sibi menm zak piyaj sa yo. Manifestan yo ki tap eksprime mekontantman yo ak pouvwa an plas la bwote matla, kit sekou, byen imobilye ak lòt materyèl sansib ki te nan espas la.

Sitiyasyon an pa chanje nan vil pwovens sa a tankou jan sa ye nan Pòtoprens pou jounen lendi sa a. Tout aktivite yo paralyser, enstitisyon leta kou prive yo pa fèmen pòt yo pandan se barikad ak flanm dife ansanm ak pwotestatè k ap manifeste ki nan lari a.

Deklarasyon chef gouvènman an sanble plis mete luil sou dife mouvman pwotestatè yo ki pou kounya, anplis reklame leta pou l fè bak sou desizyon monte pri gaz yo, egzije lokatè primati a remèt demisyon l prese prese.

Filisner DIEUJUSTE

Related Articles

Leave a Reply

Your email address will not be published. Required fields are marked *

Back to top button